0
Shares
काठमाडौँ । जापानको चारदिने औपचारिक भ्रमण सम्पन्न गरी राष्ट्रपति रामचन्द्र पौडेल बुधबार स्वदेश फर्किएका छन्। जापान सरकारको औपचारिक निमन्त्रणामा प्रथम महिला सविता पौडेलसहित नेपाली प्रतिनिधिमण्डलको नेतृत्व गर्दै जापान गएका राष्ट्रपति पौडेलले नेपाल–जापान कूटनीतिक सम्बन्ध स्थापनाको ७० औँ वर्षगाँठका अवसरमा आयोजित विभिन्न कार्यक्रममा सहभागिता जनाएका थिए।
सोमबार जापान पुगेका राष्ट्रपति पौडेलले टोकियोमा आयोजित विशेष स्वागत तथा स्मरण समारोहमा सहभागी हुँदै औपचारिक सम्बोधन गरेका थिए। उक्त भ्रमण नेपाल र जापानबीच सन् १९५६ सेप्टेम्बर १ मा स्थापना भएको कूटनीतिक सम्बन्धको सात दशक पूरा भएको ऐतिहासिक अवसरसँग केन्द्रित थियो।
समारोहमा सम्बोधन गर्दै राष्ट्रपति पौडेलले नेपाल–जापान सम्बन्ध औपचारिक कूटनीतिमा मात्र सीमित नभई आपसी विश्वास, विकास सहकार्य र जनस्तरको मित्रतामा आधारित रहेको उल्लेख गरे। उनले आगामी दिनमा दुवै देशबीचको सम्बन्धलाई अझ सुदृढ र व्यापक बनाउने अपेक्षा व्यक्त गरे।
भ्रमणका क्रममा राष्ट्रपति पौडेलले टोकियोस्थित इम्पेरियल प्यालेसमा जापानका सम्राट् नारुहितोसँग राजकीय शिष्टाचार भेट गरेका थिए। उक्त भेटलाई नेपाल–जापान सम्बन्धको दीर्घकालीन मित्रता र आपसी सम्मानको प्रतीकका रूपमा लिइएको छ। साथै, उनले जापानका प्रधानमन्त्री सुश्री ताकाइची सानाएसँग पनि शिष्टाचार भेटवार्ता गर्दै द्विपक्षीय सहकार्य, विकास साझेदारी, जनशक्ति आदान–प्रदान तथा क्षेत्रीय र अन्तर्राष्ट्रिय चासोका विषयमा छलफल गरेका थिए।
जापानका विदेश राज्यमन्त्री होरिइ इवाओसँगको भेटमा कूटनीतिक सम्बन्धको निरन्तरता र भविष्यका सहकार्यका सम्भावनाबारे विचारविनिमय भएको जनाइएको छ। राष्ट्रपति पौडेलले जापानमा बसोबास गर्ने नेपाली समुदायसँग भेटघाट गर्दै उनीहरूको योगदानको प्रशंसा गरेका थिए।
त्यसैगरी, जापानी व्यापारिक समुदायसँगको अन्तरक्रियामा उनले नेपालमा पर्यटन, जलविद्युत्, कृषि र पूर्वाधार विकासका क्षेत्रमा लगानीका सम्भावनाबारे जानकारी गराउँदै जापानी लगानीकर्तालाई नेपालमा सहकार्यका लागि आमन्त्रण गरेका थिए।
भ्रमणका क्रममा राष्ट्रपति पौडेलले जापानस्थित नेपाली राजदूतावासको पनि अवलोकन गरेका थिए। उनले दूतावासको सेवा प्रवाह, कूटनीतिक गतिविधि र जापानमा रहेका नेपाली नागरिकका विषयमा जानकारी लिँदै सेवा सुधार र सक्रियताको आवश्यकता औँल्याएका थिए।
नेपाल र जापानबीच कूटनीतिक सम्बन्ध स्थापना भएपछि नेपालले सन् १९६५ मा टोकियोमा र जापानले सन् १९६७ मा काठमाडौँमा दूतावास स्थापना गरेका थिए। त्यसयता शिक्षा, स्वास्थ्य, पूर्वाधार, मानव संसाधन विकास र विपद् व्यवस्थापनलगायतका क्षेत्रमा जापानले नेपाललाई निरन्तर सहयोग गर्दै आएको छ।
राष्ट्रपति पौडेलको यो भ्रमणलाई नेपाल–जापान सम्बन्धको ७० वर्षे यात्रालाई स्मरण गर्दै भविष्यका लागि नयाँ सन्देश दिने महत्वपूर्ण कूटनीतिक अवसरका रूपमा हेरिएको छ। स्वदेश फर्किँदै उनले जापान सरकार र जनताप्रति आतिथ्य र सद्भावका लागि आभार व्यक्त गर्दै दुई देशबीचको मित्रता अझ मजबुत हुँदै जाने विश्वास व्यक्त गरेका छन्।
