रोकी राखिएको ट्रकमा बस ठोक्किँदा सुनसरी शोकमा

सुनसरीको भोक्राहा नरसिंह गाउँपालिका–३ पुलचोकस्थित पूर्व–पश्चिम राजमार्गमा आज बिहान भएको भीषण सडक दुर्घटनाले दुई परिवार शोकमा डुबेका छन् भने दर्जनौँ यात्रु घाइते भएका छन् ।

पश्चिमबाट पूर्वतर्फ गइरहेको प्रदेश १–०२–००२ ख ०९४९ नम्बरको यात्रु बसले सडक छेउमा बिग्रिएर रोकी राखिएको ना ६ ख ३७३३ नम्बरको ट्रकलाई ठक्कर दिँदा उक्त दुर्घटना भएको हो । सुनसरी प्रहरी प्रवक्ता योगराज खतिवडाका अनुसार दुर्घटनापछि बसमा सवार यात्रुहरूबीच अफरातफरी मच्चिएको थियो ।

सूचना प्राप्त हुनासाथ जिल्ला प्रहरी कार्यालय सुनसरी र इलाका प्रहरी कार्यालय लौकहीबाट ३५ जनाको संयुक्त प्रहरी टोली घटनास्थलमा पुगेर उद्धार कार्य थालेको थियो । घाइतेमध्ये २२ जनाभन्दा बढीलाई तत्काल उद्धार गरी विभिन्न अस्पतालमा उपचारका लागि पठाइएको प्रहरीले जनाएको छ |

दुर्घटनामा घाइते भएका करिब ३५–४० वर्षका एक पुरुषको जिल्ला अस्पताल इनरुवामा उपचारकै क्रममा मृत्यु भएको छ । हालसम्म उनको नाम, थर र ठेगाना खुल्न सकेको छैन ।

त्यसैगरी, सिराहा सखुवान्नकट्टी गाउँपालिका–३ की करिब ४५ वर्षीया धनेश्वरी देवी यादवको ग्लोबल कार्डियो एण्ड न्युरो अस्पतालमा उपचारका क्रममा निधन भएको प्रहरीले पुष्टि गरेको छ|

घाइतेमध्ये केहीलाई सामान्य उपचारपछि विराटनगरस्थित गोल्डेन अस्पतालमा रिफर गरिएको छ । अधिकांश घाइते सप्तरी, सिराहा र धनगढीमाई नगरपालिकाका बासिन्दा रहेका छन् ।

प्रहरीका अनुसार केही घाइतेको अवस्था गम्भीर रहेको छ र उनीहरू आईसीयूमा उपचाररत छन् । गम्भीर घाइतेमा कञ्चनपुरकी मञ्जु चौधरी, सिराहाका सुकदेव साह, सत्यनारायण राम, मोहम्मद इसराफिल र हरि यादव रहेका छन् ।

घटनाले एकातर्फ यातायात सुरक्षाप्रति गम्भीर प्रश्न उठाएको छ भने अर्कातर्फ पीडित परिवारमा शोक र पीडाको वातावरण सिर्जना भएको छ ।