0
Shares
विराटनगर । विराटनगर महानगरपालिका वडा नं. ८ स्थित सुकुम्बासी टोलमा लामो समयदेखि जटिल बन्दै आएको नाला निर्माण तथा सडक मर्मतको समस्या समाधानका लागि स्थानीय स्तरमा ठोस निर्णय गरिएको छ। ‘परिवर्तनका लागि आवाज समूह’ को सक्रियता र वडा कार्यालयको समन्वयमा शुक्रबार भएको छलफलले समस्या समाधानको स्पष्ट मार्गचित्र तय गरेको हो।
युवा समूहको अग्रसरता र वडाको ऐक्यबद्धता सुकुम्बासी टोलमा वर्षायाममा पानी जम्ने, सडक हिलाम्मे हुने र आवतजावतमा सास्ती हुने समस्या वर्षौँदेखि कायम थियो। यसै विषयलाई लिएर ‘परिवर्तनका लागि आवाज समूह’ का प्रतिनिधिहरू मो. जमशेद आलम, निरज शाह, प्रणव यादव र सपना कार्की लगायतको टोलीले वडा कार्यालयमा लिखित निवेदन दर्ता गराएका थिए।
स्थानीयका पिरमर्कालाई सम्बोधन गर्न आयोजित छलफलमा समाजसेवी तथा युवा नेता अभिषेक गिरी पनि सहभागी हुनुहुन्थ्यो। गिरीले यस अभियानलाई पूर्ण समर्थन गर्दै समस्या समाधान नहुन्जेल ‘गिरी फाउन्डेसन’ मार्फत निरन्तर निगरानी र आवश्यक सहयोग गर्ने प्रतिबद्धता व्यक्त गर्नुभयो।
छलफलका मुख्य निर्णयहरू: वडा अध्यक्ष राम पोखरेल र स्थानीय सरोकारवालाहरू बीचको बैठकले निम्न महत्त्वपूर्ण निर्णयहरू गरेको छ:
नाला निर्माण: सुकुम्बासी बस्तीको करिब २० फिट चौडाइको सडक क्षेत्रमा दुवैतर्फ २-२ फिटको पक्की नाला निर्माण गरिने।
तत्काल बजेट: नाला निर्माणको काम सुरु गर्न वडा कार्यालयबाट तत्काल ५० हजार रुपैयाँ उपलब्ध गराउने।
थप स्रोत व्यवस्थापन: योजना सम्पन्न गर्न आवश्यक थप बजेटका लागि स्थानीय निकाय, दातृ संस्था र सरोकारवाला निकायहरूसँग समन्वय गरी आर्थिक सहयोग जुटाइने।
श्रमदान र मर्मत: नाला निर्माणसँगै सडक मर्मत र सरसफाइलाई प्राथमिकता दिइनेछ, जसमा स्थानीय बासिन्दाहरूको श्रमदानलाई समेत परिचालन गरिनेछ।
महानगरसँग समन्वय: सडकको दीर्घकालीन सुधारका लागि महानगरपालिकासँग थप प्राविधिक र आर्थिक सहयोग माग गर्ने निर्णय गरिएको छ।
लामो समयदेखि ओझेलमा परेको यो समस्या समाधानतर्फ अघि बढेपछि स्थानीय बासिन्दाहरूमा उत्साह छाएको छ। नाला निर्माण र सडक मर्मत भएपछि वर्षायाममा हुने डुबानको समस्या अन्त्य हुने र आवतजावत सहज हुने अपेक्षा गरिएको छ।
वडा अध्यक्ष राम पोखरेलले स्थानीय युवाहरूको जागरुकताको प्रशंसा गर्दै वडा कार्यालय विकास निर्माणका कार्यमा सदैव तत्पर रहेको बताउनुभयो।
