0
Shares
काठमाडौँ । धादिङ–१ अहिले फेरि चुनावी सरगर्मीको केन्द्रमा छ। धुनीबेसी नगरपालिकासहित बेनीघाट रोराङ, सिद्धलेक, गजुरी, गल्छी र थाक्रे गाउँपालिका पर्ने यो क्षेत्र राजनीतिक दृष्टिले लामो समयदेखि एकै अनुहारले सम्हाल्दै आएको छ।
साढे तीन दशकयता लगातार निर्वाचन जित्दै आएका वरिष्ठ नेता राजेन्द्रप्रसाद पाण्डे यसपालि पनि प्रतिस्पर्धामा छन्। तर, यस पटक उनीसँग चुनौती थपिएको छ—पुराना प्रतिस्पर्धी भूमिप्रसाद त्रिपाठी मात्र होइन, नयाँ पुस्ताका उमेदवारहरू पनि मैदानमा छन्।
६९ वर्षीय पाण्डे नेपाली कम्युनिष्ट पार्टीका अनुभवी नेता हुन्। शिक्षण पेशाबाट राजनीतिमा प्रवेश गरेका पाण्डे २०३३ सालदेखि कम्युनिष्ट आन्दोलनमा सक्रिय छन्। २०४८ देखि विभिन्न निर्वाचन क्षेत्रमा प्रतिनिधिसभा सदस्य निर्वाचित भइसकेका उनी हाल एकीकृत समाजवादीका वरिष्ठ उपाध्यक्ष हुन्।
पाण्डेसँगै एमालेका ६० वर्षीय भूमिप्रसाद त्रिपाठी पनि धादिङ–१ मा पुराना प्रतिस्पर्धीको रूपमा परिचित छन्। विद्यार्थी जीवनदेखि राजनीतिमा सक्रिय त्रिपाठी २०७४ मा प्रतिनिधिसभा विजयी भइसकेका छन्। २०७९ मा पाण्डेसँग प्रत्यक्ष प्रतिस्पर्धामा पराजित भएका उनी यसपालि पुनः चुनौती दिन तयार छन्।
पुराना नेताको भिडन्तबीच नयाँ पुस्ताका नेता पनि चुनावलाई रोचक बनाएका छन्। कृष्ण रिजाल नेपाली कांग्रेसका ४३ वर्षीय नेता हुन्। पूर्व विद्यार्थी नेता र कांग्रेसको सक्रिय सदस्य रहेका उनी यसपालि कम्युनिष्ट प्रभुत्वको अन्त्यका लागि मैदानमा छन्।
त्यसैगरी, आशिका तामाङ राष्ट्रिय स्वतन्त्र पार्टीकी ३७ वर्षीय उमेदवार हुन्। सामाजिक अभियन्ताबाट राजनीतिमा प्रवेश गरेकी उनी परम्परागत राजनीतिबाट असन्तुष्ट मतदाताको मन जित्ने लक्ष्य राख्छिन्।
उज्यालो नेपाल पार्टीका श्यामराजा पाण्डे, राष्ट्रिय प्रजातन्त्र पार्टीका गीताप्रसाद आचार्य, नेमकिपाका चन्द्रादेवी वासुकला र केही स्वतन्त्र उम्मेदवार पनि प्रतिस्पर्धामा छन्।
धादिङ–१ मा एमालेको प्रभाव भए पनि कांग्रेस र नयाँ पार्टीका उमेदवारहरूले चुनौती थपेका छन्। पुराना नेताहरू आफ्नो राजनीतिक विरासत जोगाउन लागिपरेका छन् भने नयाँ पुस्ताले आधुनिक शैली र नयाँ भाष्यका साथ मतदातासँग जोडिन खोजिरहेका छन्।
धादिङ–१ को यो निर्वाचन केवल जित–हारको प्रश्न मात्र होइन, अनुभव र नयाँ अपेक्षाबीचको टकराव पनि हो। दशकौँदेखि राजनीति र निर्वाचनको अनुभव बोकेका पुराना नेतासँग पहिलोपटक संसद् प्रवेश गर्ने आकांक्षा बोकेका नयाँ उम्मेदवार भिडिरहेका छन्।
निर्वाचन नजिकिँदै गर्दा धादिङ–१ को राजनीतिक मैदान लामो समयपछि फेरि अत्यन्तै प्रतिस्पर्धात्मक र रोचक बनेको छ।
