0
Shares
काठमाडौँ । प्रधानमन्त्री सुशीला कार्की र पूर्वप्रधानमन्त्री तथा नेकपा (एमाले) का अध्यक्ष केपी शर्मा ओलीबीच आज दिउँसो निर्वाचन सम्बन्धी छलफल भएको छ। भेटवार्ता प्रधानमन्त्रीको सरकारी निवास बालुवाटारमा भएको प्रधानमन्त्रीको सचिवालयले जनाएको छ।
प्रधानमन्त्रीका प्रेस विज्ञ रामबहादुर रावलका अनुसार बैठकको मुख्य विषय फागुन २१ गते सम्पन्न हुने प्रतिनिधिसभा निर्वाचनलाई भयरहित, स्वतन्त्र र निष्पक्ष रूपमा सम्पन्न गराउने व्यवस्था सुनिश्चित गर्नु रहेको थियो। अध्यक्ष ओलीले विशेषगरी निर्वाचनका क्रममा सुरक्षा व्यवस्थाबारे चासो व्यक्त गर्नुभएको थियो।
अध्यक्ष ओली आफ्नो प्रमुख स्वकीय सचिव राजेश बज्राचार्यको साथमा बालुवाटार पुगेका थिए र पार्टीका अन्य नेताहरू उनीसँग उपस्थित थिएनन्। रावलका अनुसार, भेटवार्ता मूलतः निर्वाचन केन्द्रित भए पनि वर्तमान राजनीतिक परिस्थितिबारे सामान्य छलफल पनि भएको थियो।
बैठकले निर्वाचनको शान्तिपूर्ण र निष्पक्ष सञ्चालनमा सरकार र राजनीतिक दलबीच समन्वयको आवश्यकतालाई अझ बलियो बनाउने अपेक्षा गरिएको छ।
