0
Shares
झापा। सुर्खेतकी इनिशा विकको बलात्कारपछि हत्या भएको घटनाप्रति कडा कानुनी कारबाहीको माग गर्दै सोमबार (चैत २) झापाको काँकडभिट्टामा विरोध प्रदर्शन गरिएको छ।
प्रगतिशील युवा क्लब धुलाबारीको अगुवाइमा काँकडभिट्टास्थित हनुमान मन्दिर परिसरबाट सुरु गरिएको विरोध र्यालीले नगरका विभिन्न भागको परिक्रमा गरेपछि पूर्वी प्रवेशद्वारमा पुगेर खबरदारी सभामा परिणत भएको थियो।
र्यालीमा मेचीनगर नगरपालिका क्षेत्रका विभिन्न विद्यालयका विद्यार्थी, शिक्षक, मानव अधिकारकर्मी, संघसंस्थाका प्रतिनिधि र सञ्चारकर्मीहरूको सहभागिता थियो। सहभागीहरूले ‘दोषीलाई कडाभन्दा कडा कारबाही गर’, ‘हत्या हिंसा बन्द गर’, ‘जहाँ छोरी डराउँछे, त्यहाँ समाज असफल हुन्छ’ जस्ता नारा लेखिएका प्लेकार्ड बोकेका थिए।
सभामा नेपाल पत्रकार महासंघ कोसी प्रदेशकी उपाध्यक्ष अम्बिका भण्डारी, शिक्षक सुभद्रा भट्टराई, महिला अधिकारकर्मीद्वय राधा प्रधान र पूजा सापकोटा तथा मानव अधिकारकर्मी विनय कार्कीले घटनाको निष्पक्ष छानबिन गरी दोषीलाई हदैसम्मको सजाय दिन माग गरे।
उनीहरूले यस्ता जघन्य अपराधले समाजमा असुरक्षा बढाएको भन्दै पीडित परिवारलाई अविलम्ब न्याय दिलाउन सरकारको ध्यानाकर्षण गराए।-रासस
