राष्ट्रपति पौडेलद्वारा तमु ल्होसारको अवसरमा सामाजिक एकता र सहिष्णुतामा जोड

काठमाडौँ । राष्ट्रपति रामचन्द्र पौडेलले गुरुङ समुदायको महान् पर्व तमु ल्होसारले नेपाली समाजमा सहिष्णुता, बन्धुत्व र सामाजिक एकता अभिवृद्धि गर्न मद्दत पुग्ने बताउनुभएको छ।

मङ्गलबार तमु ल्होसारको अवसरमा शुभकामना सन्देश जारी गर्दै राष्ट्रपति पौडेलले नेपालको ऐतिहासिक, साँस्कृतिक र सामाजिक परम्पराको संरक्षण तथा संवर्द्धनमा यस पर्वले योगदान पुर्‍याउने अपेक्षा व्यक्त गर्नुभएको हो। उहाँले यस अवसरमा सामाजिक मेलमिलाप र पर्यटन प्रवर्द्धनमा पनि पर्वले टेवा पुर्‍याउने विश्वास व्यक्त गर्नुभयो।

राष्ट्रपति पौडेलले भन्नुभयो, “गुरुङ समुदायको प्राचीन पात्रो प्रणाली र जीवन शैलीसँग सम्बन्धित तमु ल्होसार पर्वले बहुजातीय, बहुभाषिक र बहुसाँस्कृतिक नेपाली समाजमा जातीय सद्भाव, विविधताको सम्मान र राष्ट्रिय एकता प्रवर्द्धन गर्न योगदान पुर्‍याउने छ। यसले सबै नेपालीबीच सहिष्णुता र बन्धुत्वको भावना अभिवृद्धि गर्ने विश्वास लिएको छु।”

उहाँले तमु ल्होसारले आपसी विश्वास र एकताको भावना अभिवृद्धि गर्दै आर्थिक, सामाजिक र साँस्कृतिक रूपले समृद्ध मुलुक निर्माणमा ऊर्जा प्रदान गरोस् भन्ने कामना पनि व्यक्त गर्नुभयो।

नेपालका हिमाली र उच्च पहाडी भेगमा बसोबास गर्ने गुरुङ समुदायले नयाँ वर्षको सुरुवातको रूपमा तमु ल्होसार पर्व हर्षोल्लासका साथ मनाउने परम्परा चलाएको छ। समुदायको बाहुल्यता भएका विभिन्न जिल्लाहरूमा यो पर्व विशेष धुमधामसँग मनाइन्छ