0
Shares
काठमाण्डौ । राष्ट्रिय सभा निर्वाचनका लागि नेपाली कांग्रेसले आफ्ना उम्मेदवारको नाम टुंगो लगाएको छ। नेपाली कांग्रेस, नेकपा एमाले र जनता समाजवादी पार्टी नेपालबीच भएको सहमतिअनुसार संयुक्त तालमेलमा उम्मेदवारी दिने निर्णय गरिएको हो।
तालमेलअनुसार कांग्रेसको भागमा ९ सिट परेको छ भने एमालेले ८ र जसपा नेपालले १ सिट लिने सहमति भएको कांग्रेस नेता रमेश लेखकले जानकारी दिए।
कांग्रेसले सार्वजनिक गरेको सूचीअनुसार कोशी प्रदेशबाट सुनीलबहादुर थापा उम्मेदवार बनेका छन्। मधेस प्रदेशमा धनेन्द्र पासवास र रञ्जित कर्णलाई अघि सारिएको छ। बागमती प्रदेशबाट गीता देवकोटा, गण्डकीबाट तिमिल्सिना उम्मेदवार हुनेछन्।
त्यसैगरी लुम्बिनी प्रदेशबाट बासुदेव जंगली र चन्द्रबहादुर केसी, कर्णाली प्रदेशबाट ललितजंग शाही तथा सुदूरपश्चिम प्रदेशबाट खम्मबहादुर खाती उम्मेदवार तय भएका छन्।
नेकपा एमालेले मधेस प्रदेशबाहेक अन्य प्रदेशमा आफ्ना उम्मेदवार टुंग्याइसकेको जनाएको छ भने जसपा नेपालले महन्थ ठाकुरलाई उम्मेदवार बनाउने तयारी गरेको छ।
राष्ट्रिय सभा निर्वाचनअन्तर्गत आज उम्मेदवारी मनोनयन दर्ता हुँदैछ। निर्वाचन आयोगका अनुसार बिहान १० बजेदेखि दिउँसो ३ बजेसम्म मनोनयन दर्ताको समय तोकिएको छ।
फागुन २० गतेदेखि रिक्त हुन लागेको १८ सिटका लागि मनोनयन दर्ता भइरहेको हो भने राष्ट्रिय सभा निर्वाचन माघ ११ गते हुने तय भएको छ।
