काठमाडौं । नेपाली कांग्रेसका महामन्त्री गगन थापाले राष्ट्रिय सभा निर्वाचनका लागि उम्मेदवार छनोट प्रक्रियामा असहमति जनाएका छन्। केन्द्रीय कार्यसम्पादन समितिको बैठकपछि उनले नेताहरूले पार्टी छलफल नगरी व्यक्तिगत सम्बन्धको आधारमा उम्मेदवार छानेको बताएका छन्।
थापाका अनुसार, कांग्रेसले बनाएका ९ उम्मेदवारमध्ये ३ जना कुनै पनि कमिटीबाट सिफारिसमा नपरेको र जनजाति तथा मुस्लिम समुदाय समावेश नभएको उल्लेख छ। उनले नेकपा एमालेसँगको तालमेलको विषयमा पनि प्रश्न उठाउँदै भने, “नेपाली कम्युनिस्ट पार्टीसँग तालमेल गरेको भए १५ सिट सम्भव हुन्थ्यो। सिटभन्दा संविधान र देश ठूलो हो।”
थापाले आफू र अर्को महामन्त्री विश्वप्रकाश शर्माको भूमिकालाई घेराबन्दी गरिएको पनि बताएका छन् र प्रक्रियाप्रति फरक मत दर्ज गरेको बताए।
राष्ट्रिय सभा निर्वाचनका लागि आज सातवटै प्रदेशमा १८ सांसदका उम्मेदवारी दर्ता हुनेछ। कांग्रेस, नेकपा एमाले र जसपा नेपालले क्रमशः ९, ८ र १ सिटमा भागबन्डा गर्ने सहमति गरेका छन्।
