0
Shares
काठमाडौं । संघीय संसदअन्तर्गत नेपालको संघीय संसदको माथिल्लो सदन राष्ट्रिय सभा का नवनिर्वाचित सदस्यहरूले पद तथा गोपनीयताको शपथ लिएका छन्।
सोमबार सिंहदरबारमा आयोजित कार्यक्रममा राष्ट्रिय सभाका अध्यक्ष नारायणप्रसाद दाहालले संविधानको धारा ८६ को उपधारा २ अनुसार नव निर्वाचित सदस्यहरूलाई शपथ ग्रहण गराएका हुन्।
शपथ ग्रहणपछि अध्यक्ष दाहालले नवनिर्वाचित सदस्यहरूलाई संसदको आधिकारिक लोगो प्रदान गर्दै उनीहरूको कार्यकाल सफल रहोस् भन्ने शुभकामना व्यक्त गरे। उनले राष्ट्रिय सभाले कानून निर्माण, नीति निर्माण तथा संघीय व्यवस्थालाई मजबुत बनाउन महत्वपूर्ण भूमिका खेल्ने विश्वास व्यक्त गरे।
गत माघ ११ गते सम्पन्न निर्वाचनमार्फत विभिन्न प्रदेशबाट राष्ट्रिय सभाका १८ सदस्य निर्वाचित भएका थिए। कोशी प्रदेशबाट रोश्नी मेचे, सोमनाथ पोर्तेल, सुनिलबहादुर थापा निर्वाचित भएका छन्। त्यस्तै मधेस प्रदेशबाट रेखाकुमारी झा, धर्मेन्द्र पासवान, रञ्जित कर्ण र महन्थ ठाकुर निर्वाचित भएका हुन्।
यसैगरी बागमती प्रदेशबाट गीता देवकोटा र प्रेमप्रसाद दङ्गाल विजयी भएका छन् भने गण्डकी प्रदेशबाट जगत तिमिल्सिना र सम्झना देवकोटा राष्ट्रिय सभा सदस्यमा निर्वाचित भएका छन्।
लुम्बिनी प्रदेशबाट रामकुमारी झाँक्री, चन्द्रबहादुर केसी र वासुदेव घिमिरे निर्वाचित भएका छन्। कर्णाली प्रदेशबाट मीनासिंह रखाल र ललितजंग शाही तथा सुदूरपश्चिम प्रदेशबाट लीलाकुमारी भण्डारी र खम्मबहादुर खाती राष्ट्रिय सभा सदस्य बनेका छन्।
५९ सदस्यीय राष्ट्रिय सभामा संविधानअनुसार एक तिहाइ सदस्यको कार्यकाल प्रत्येक दुई वर्षमा समाप्त हुने व्यवस्था छ। सोही व्यवस्थाअनुसार रिक्त भएका स्थानमा निर्वाचन गरी नयाँ सदस्यहरू चयन गरिने प्रावधान रहेको छ।
