0
Shares
टोरन्टो । क्यानडाले भारतीय लरेन्स बिश्नोईको समूहलाई ‘आतंकवादी संगठन’ घोषणा गरेको छ । यो निर्णयले क्यानडा सरकारलाई बिश्नोई गिरोहको सम्पत्ति जफत गर्ने र यसको पैसा रोक्का गर्ने अधिकार दिनेछ ।
क्यानडाका सार्वजनिक सुरक्षा मन्त्री ग्यारी आनन्दसाङ्गरीले सोमबार यो घोषणा गरेका हुन् ।
समूहले क्यानडाका आप्रवासी समुदायहरूमा डर र त्रासको वातावरण सिर्जना गरेको उनको भनाइ थियो । ‘यस समूहलाई आतंकवादी संगठन घोषित गर्दा उनीहरूको अपराधसँग लड्न र यसलाई रोक्न बलियो अनि प्रभावकारी तरिकाहरूमा मद्दत मिल्नेछ,’ आनन्दसाङ्गरीले भने । भारतीय सरकारी एजेन्टहरूले बिश्नोई गिरोहका सदस्यहरूलाई हत्या, जबरजस्ती र हिंसात्मक कार्यहरू गर्न र खालिस्तान समर्थकहरूलाई लक्षित गर्न प्रयोग गरिरहेको गएको वर्ष क्यानडाली प्रहरीले आरोप लगाएको थियो ।
भारतले यी आरोपहरूलाई अस्वीकार गरेको थियो अनि क्यानडाले यस सम्बन्धमा कुनै प्रमाण प्रस्तुत नगरेको बताएको थियो ।
बिश्नोई गिरोह भारतमा ३२ वर्षीय गुण्डा नाइके लरेन्स बिश्नोईद्वारा सञ्चालित समूह हो । लरेन्स एक दशकदेखि जेलमा छन् । यस गिरोहको क्यानडामा पनि उपस्थिति रहेको र ठूलो आप्रवासी जनसंख्या भएको क्षेत्रहरूमा यसका गतिविधि सञ्चालन हुने क्यानडाले बताएको छ ।
