0
Shares
मध्यपूर्वमा तीव्र बन्दै गएको सैन्य तनावबीच इरान र संयुक्त राज्य अमेरिका बीचको टकराव थप गहिरिएको छ। अमेरिकी चेतावनीको कडा प्रतिवाद गर्दै इरानले आफ्ना पूर्वाधारमा कुनै पनि आक्रमण भए क्षेत्रभरिका रणनीतिक संरचनामाथि प्रतिआक्रमण गर्ने स्पष्ट सङ्केत दिएको छ।
अमेरिकी राष्ट्रपति डोनाल्ड ट्रम्पले इरानले होर्मुज जलडमरूमध्य खुला नगरे शक्तिशाली सैन्य प्रहार गर्ने चेतावनी दिएका छन्। उनले आफ्नो ट्रुथ सोसल प्लेटफर्ममार्फत ४८ घण्टाको समयसीमा दिँदै जलडमरूमध्य नखुले देशका प्रमुख ऊर्जा पूर्वाधारहरू, विशेषगरी पावर प्लान्टहरूलाई लक्षित गरी ‘नष्ट गर्ने’ चेतावनी दिएका हुन्।
यसको जवाफमा इरानको सैन्य परिचालन कमान्डले अमेरिका र उसका सहयोगीहरूसँग सम्बन्धित ऊर्जा, सूचना प्रविधि तथा डिसेलिनेसन पूर्वाधारहरू क्षेत्रभरि निशानामा पर्ने चेतावनी दिएको छ। इरानले यस्तो कदमले क्षेत्रीय द्वन्द्व अझ व्यापक बन्न सक्ने संकेत दिएको छ।
यसैबीच, इरानले आफ्नो नतान्ज आणविक केन्द्र मा भएको आक्रमणपछि इजरायल का दक्षिणी सहर अराद र डिमोना मा क्षेप्यास्त्र प्रहार गरेको जनाएको छ। इजरायली हवाई सुरक्षालाई पार गर्दै गरिएका ती आक्रमणहरूले आवासीय क्षेत्रमा क्षति पुर्याएको र १०० भन्दा बढी मानिस घाइते भएको जनाइएको छ।
डिमोनास्थित संवेदनशील आणविक क्षेत्र नजिकै प्रहार हुँदा सुरक्षा चिन्ता थप बढेको छ। यद्यपि, इजरायलले आफ्नो आणविक क्षमताबारे औपचारिक रूपमा पुष्टि गरेको छैन।
इरानको आक्रमणपछि इजरायलले राजधानी तेहरान लक्षित गर्दै नयाँ हवाई आक्रमण सुरु गरेको जनाएको छ। पछिल्ला तीन हप्तादेखि जारी द्वन्द्वमा यो आक्रमण सबैभन्दा विनाशकारीमध्ये एक मानिएको छ। प्रभावित क्षेत्रहरूमा उद्धारकर्मीहरूले भग्नावशेषबाट घाइतेहरूको खोजी तथा उद्धार गरिरहेका छन्।
यो सम्पूर्ण तनावको केन्द्रमा रहेको होर्मुज जलडमरूमध्य विश्व अर्थतन्त्रका लागि अत्यन्त महत्वपूर्ण समुद्री मार्ग हो। यहाँबाट विश्वको करिब पाँचौँ भाग कच्चा तेल ओसारपसार हुने गर्दछ। हालको अवरोधका कारण अन्तर्राष्ट्रिय बजारमा कच्चा तेलको मूल्य प्रतिब्यारेल १०५ डलरभन्दा माथि पुगेको छ, जसले विश्वव्यापी आर्थिक अस्थिरताको संकेत दिएको छ।
