आज राति मेसीको ‘लास्ट डान्स’ कि लामिन यमालको ‘न्यु इरा’?कसको शिरमा सजिएला विश्वकपको ताज ?

३ साउन, काठमाडौं। ४८ टोली, १०४ खेल र अब बाँकी छ केवल एक अन्तिम विजेता। ९६ वर्ष लामो विश्वकप इतिहासको २३औं संस्करण अन्ततः यस्तो रोमान्चक मोडमा आइपुगेको छ, जहाँ फेरि एकपटक फुटबल साम्राज्यको नयाँ इतिहास लेखिने तयारी भइरहेको छ।

अमेरिकाको न्युयोर्क–न्यु जर्सी स्टेडियममा सोमबार बिहान (नेपाली समय अनुसार साउन ४ गते राति १२:४५ बजे) हुने फिफा विश्वकप २०२६ को फाइनल केवल दुई टोलीबीचको उपाधि भिडन्त मात्र होइन; यो दुई पुस्ता, दुई शैली र दुई फरक फुटबल दर्शनबीचको निर्णायक महासंग्राम पनि हो।

एकातिर आठौंपटक विश्वकप फाइनल खेल्न लागेको साविक विजेता अर्जेन्टिना छ, जसको केन्द्रमा अझै पनि जादुगर लियोनल मेसी छन्। लगातार दोस्रो विश्वकप जित्दै फुटबल इतिहासमा दुर्लभ उपलब्धि हासिल गर्ने लक्ष्यमा अर्जेन्टिना देखिन्छ। अर्कोतिर युवा जोश, तीव्र आक्रमण र आकर्षक फुटबलले विश्वलाई मन्त्रमुग्ध बनाएको युरोपियन च्याम्पियन स्पेन छ, जो १६ वर्षपछि फेरि विश्व फुटबलको सर्वोच्च सिंहासनमा फर्किने सपना बुन्दैछ।

यो फाइनलमा अनुभवी मेसीले आफ्नो ऐतिहासिक करियरमा अर्को स्वर्णिम अध्याय थप्ने प्रयास गर्नेछन् भने १८ वर्षीय विङ्गर लामिन यमाल विश्व फुटबलमा आफ्नो नयाँ युग सुरु गर्ने लक्ष्यमा हुनेछन्। त्यसैले, यो महाभिडन्तमा केवल ट्रफीको मात्र होइन, फुटबलको भविष्य कसको हातमा जाने भन्ने प्रश्नको उत्तर पनि खोजिनेछ।

स्पेनको अपराजित र नियन्त्रित यात्रा
प्रतियोगिताभर नियन्त्रणमा आधारित आक्रामक फुटबल खेल्दै स्पेन सबैभन्दा प्रभावशाली टोलीका रूपमा उभिएको छ। सेमिफाइनलमा उपाधिको मुख्य दाबेदार फ्रान्सलाई पूर्ण रूपमा दबाबमा राख्दै स्पेनले फाइनल यात्रा तय गरेको हो। लामो समय बल आफ्नो नियन्त्रणमा राख्ने शैली र सटीक फिनिसिङ स्पेनको मुख्य हतियार बनेको छ।

समूह ‘एच’ को पहिलो खेलमा केप भर्डेसँग गोलरहित बराबरीमा रोकिए पनि स्पेनले साउदी अरेबियालाई ४–० र उरुग्वेलाई १–० ले हराउँदै समूह विजेता बनेको थियो। नकआउट चरणको अन्तिम ३२ मा अस्ट्रियालाई ३–० ले पाखा लगाएको स्पेनले अन्तिम १६ मा पोर्चुगल र क्वार्टरफाइनलमा बेल्जियमलाई मिकेल मेरिनोको अन्तिम समयको निर्णायक गोल मद्दतमा स्तब्ध पारेको थियो। प्रतियोगिताभर स्पेनले हालसम्म केवल एक गोल मात्र बेहोरेको छ, जसले उसको बलियो रक्षापंक्ति प्रमाणित गर्छ।

कठिन चुनौती पन्छाउँदै फाइनलमा अर्जेन्टिना
कोपा अमेरिका विजेता तथा विश्वकपको डिफेन्डिङ च्याम्पियन अर्जेन्टिनाको फाइनल यात्रा भने स्पेनको तुलनामा निकै चुनौतीपूर्ण रह्यो। मेसीको कप्तानीमा अल्जेरियाविरुद्ध ह्याट्रिक, अस्ट्रियाविरुद्ध दुई गोल तथा जोर्डनविरुद्ध उत्कृष्ट प्रदर्शन गर्दै अर्जेन्टिनाले समूह चरण सहजै पार गरे पनि नकआउटमा उसले कडा संघर्ष गर्नुपर्‍यो।

अन्तिम ३२ मा केप भर्डेलाई अतिरिक्त समयमा ३–२ ले हराएको अर्जेन्टिनाले अन्तिम १६ मा इजिप्टविरुद्ध ७९औं मिनेटसम्म २–० ले पछि परेको अवस्थालाई उल्ट्याउँदै ऐतिहासिक पुनरागमन जित निकालेको थियो। अर्जेन्टिनाका लागि यसपटक पनि सबैको नजर ८ गोलसहित गोल्डेन बुटको दौडमा रहेका लियोनल मेसीमाथि नै हुनेछ।

निर्णायक खेलाडी र टोलीको अवस्था
फाइनल खेलअघि स्पेनका युवा स्टार लामिन यमाल ट्रेनिङमा नदेखिएको हल्ला चले पनि दुवै टोलीका मुख्य खेलाडीहरू पूर्ण रूपमा फिट र खेल्न योग्य छन्। स्पेनका लागि यमालसँगै कप्तान रोड्री, डानी ओल्मो र रक्षापंक्तिमा आयमेरिक लापोर्टे–पाउ कुबार्सीको जोडी निर्णायक बन्न सक्छन्। अर्कोतर्फ, अर्जेन्टिनाका लागि मेसीसँगै जुलियन आल्भारेज, लाउतारो मार्टिनेज, एन्जो फर्नान्डेज र संकटमोचक गोलकिपर एमिलियानो मार्टिनेज मुख्य खम्बा हुन्।

दुवै टोलीको सम्भावित ११ (Probable XI):

खेल : स्पेन  VS  अर्जेन्टिना,FINAL

मिति र समय : ४ साउन बिहान १२:४५ बजे

स्थान : न्युयोर्क न्युजर्सी स्टेडियम