0
Shares
रुस–युक्रेन युद्धको चर्को तनावकै बीच अमेरिका र युक्रेनबीच युद्ध अन्त्यका उपाय खोज्न स्विट्जरल्याण्डको जेनेभा मा नयाँ चरणको कूटनीतिक वार्ता सुरु हुने भएको छ। कूटनीतिक पहल तीव्र पारिँदै गर्दा युद्धभूमिमा भने हिंसा रोकिएको छैन।
यस चरणको वार्तामा युक्रेनका प्रमुख वार्ताकार रुस्तम उमरोभ सहभागी हुनेछन् भने अमेरिकी पक्षबाट राष्ट्रपति डोनाल्ड ट्रम्प का दूत स्टिभ विटकफ र जारेड कुसनर सहभागी हुने बताइएको छ। मार्चको सुरुवातमा रुससमेत सहभागी हुने त्रिपक्षीय बैठक हुने अपेक्षा गरिएको छ।
रुसी समाचार एजेन्सी तासका अनुसार क्रेमलिनका आर्थिक दूत किरिल दिमित्रीभ पनि अमेरिकी प्रतिनिधिसँग आर्थिक विषयमा छलफल गर्न जेनेभा पुग्ने तयारीमा छन्। ट्रम्प प्रशासनको पहलमा अघि बढाइएको यस वार्ताले दोस्रो विश्वयुद्धपछि युरोपको सबैभन्दा घातक मानिएको द्वन्द्व अन्त्य गर्ने प्रयासलाई गति दिने अपेक्षा गरिएको छ, यद्यपि ठोस उपलब्धि अझै हासिल हुन सकेको छैन।
यसैबीच, वार्ताअघि रुसले युक्रेनका विभिन्न क्षेत्रमा आक्रमण तीव्र बनाएको छ। राजधानी किएभ मा विस्फोटका आवाज सुनिएको एएफपीका पत्रकारहरूले बताएका छन्। युक्रेनी वायु सेनाका अनुसार राजधानीतर्फ तीव्र गतिमा हतियार प्रणाली अघि बढिरहेको थियो।
किएभ सैन्य प्रशासन प्रमुख तिमुर टाकाचेन्कोका अनुसार रुसले ड्रोन र ब्यालेस्टिक क्षेप्यास्त्र प्रयोग गरी आक्रमण गरिरहेको छ। खार्किव, जापोरिझिया र ड्निप्रोपेट्रोभस्क क्षेत्रमा पनि आक्रमण भएको छ, जसमा खार्किवमा मात्र सात जना घाइते भएका छन्।
वार्ताको पूर्वसन्ध्यामा युक्रेनी राष्ट्रपति भोलोदिमर जेलेन्स्की ले अमेरिकी राष्ट्रपति ट्रम्पसँग करिब ३० मिनेट टेलिफोन वार्ता गरेका थिए। उक्त संवादमा वार्ताका एजेन्डा तथा मार्चमा हुने सम्भावित त्रिपक्षीय बैठकको तयारीबारे छलफल भएको जनाइएको छ।
युक्रेनले दीर्घकालीन सुरक्षा प्रत्याभूति बिना कुनै सम्झौतामा हस्ताक्षर नगर्ने अडान दोहोर्याएको छ। वार्ताको मुख्य अवरोध पूर्वी युक्रेनको औद्योगिक क्षेत्र डोनबासको भविष्य रहेको बताइन्छ। रुसले डोनेट्स्क क्षेत्रमा पूर्ण नियन्त्रणको माग गर्दै आएको छ भने किएभले यस्तो माग अस्वीकार गर्दै भविष्यमा पुनः आक्रमण रोक्ने स्पष्ट सुरक्षा संयन्त्र अनिवार्य हुने बताएको छ।
चार वर्षदेखि जारी युद्ध अन्त्य गर्ने प्रयास तीव्र पारिए पनि युद्धभूमिको वास्तविकता भने अझै जटिल र अनिश्चित बनेको छ।
