इतिहास सम्झाइरहने धरानको सिद्रा बजार

धरान — धरानको भानुचोकबाट पूर्वतर्फ आफ्नै संसारमा मग्न छ, माछाभौडी गल्ली । यहाँ बिहानदेखि साँझसम्मै सिद्राको बास्ना फैलिइरहेको हुन्छ । सडक छेउमा लस्करै बसेका व्यापारी विभिन्न प्रजातिका सिद्रा बेच्नैमा व्यस्त देखिन्छन् ।

धरानको स्थापनाकालदेखिको यहाँको पुरानो बजारमा पुर्खाहरूले सुरु गरेको यो व्यापार आज पनि यहाँका मानिसको जीवनशैलीसँग जोडिएको छ । यो जीविकोपार्जनको माध्यम मात्र होइन, परम्पराजस्तै बनिसकेको छ ।